డ్రగ్స్‌, గంజాయి నియత్రణకు చర్యలు
వివరాలు తెలిస్తే 8019263862, 8712671111..
నెంబర్లకు ఫోన్‌ చేయండి : కలెక్టర్‌
కరీంనగర్-జనత న్యూస్‌
అన్ని విద్యా సంస్థల్లో డ్రగ్స్‌, గంజాయి నియంత్రణకు కాన్షియస్ క్లబ్‌లు ఏర్పాటు చేస్తున్నట్లు ప్రకటించారు జిల్లా కలెక్టర్‌ పమేల సత్పతి. కరీంనగర్ కలెక్టరేట్‌ ఆడిటోరియంలో డ్రగ్స్‌ నియంత్రణపై ఎక్సైజ్‌, ఇతర శాఖల అధికారులతో సమావేశం నిర్వహించారు. ఈ సందర్భంగా కలెక్టర్‌ మాట్లాడుతూ..యువత డ్రగ్స్‌, ఆల్కహాల్‌, ఇతర చెడు వ్యసనాలకు దూరంగా ఉండాలని సూచించారు. వీటి భారిన విద్యార్థులు పడకుండా అవగాహన కల్పించేందుకు జిల్లాలోని అన్ని విద్యా సంస్థల్లో కాన్షియస్ క్లబ్‌ లను ఏర్పాటు చేస్తున్నామని తెలిపారు. ప్రతి క్లబ్‌ లో ఇద్దరు ఉపాధ్యాయులు, వాలంటీర్లు, విద్యార్థులు ఉంటారని పేర్కొన్నారు. వీరంతా చెడు వ్యసనాల బారిన పడకుండా విద్యార్థులకు అవగాహన కల్పిస్తారని వివరించారు. జులై నెల ఆఖరి వరకు అన్ని విద్యాసంస్థలు, హాస్టళ్లలో కాన్సియస్‌ క్లబ్‌ లు ఏర్పాటు చేయాలని అధికారులను ఆదేశించారు. సీఎం రేవంత్‌ రెడ్డి డ్రగ్స్‌ మాఫియా నియంత్రణకు కఠిన చర్యలు తీసుకుంటున్నారని వివరించారు. డ్రగ్స్‌, గంజాయి కొనుగోలు చేసినా.. విక్రయించినా కఠిన చర్యలు తప్పవని హెచ్చరించారు. నిందితులకు నాన్‌ బెయిలబుల్‌ కేసులతో పాటు జైలు శిక్ష పడే అవకాశం ఉందని తెలిపారు. వీటిపై విస్తృతంగా అవగాహన కల్పించాలని అధికారులకు ఆమె సూచించారు. జిల్లాలో డ్రగ్స్‌, గంజాయిని ఎవరైనా విక్రయించినా, కొనుగోలు చేసినా.. వారి సమాచారం ఇవ్వాలని కోరారు. ఏమైనా వివరాలు తెలిస్తే కరీంనగర్ లోని కంట్రోల్‌ రూమ్‌ 8019263862, టీజీఎన్‌ ఏబీ నంబర్‌ 8712671111 కు సమాచారం ఇవ్వాలని సూచించారు. అనంతరం విద్యాసంస్థల్లో ఏర్పాటు చేయనున్న కాన్షియస్ క్లబ్‌లకు సంబంధించిన పోస్టర్‌ ను జిల్లా కలెక్టర్‌ ఆవిష్కరించారు. ఈ సమావేశంలో స్థానిక సంస్థల అదనపు కలెక్టర్‌ ప్రఫుల్‌ దేశాయ్‌, జిల్లా ఎక్సైజ్‌ సూపరిండెంట్‌ శ్రీనివాసరావు, జిల్లా వైద్యాధికారి సుజాత, సంక్షేమ అధికారి సరస్వతి, వ్యవసాయ అధికారి శ్రీనివాస్‌, వివిధ శాఖల అధికారులు, సిబ్బంది పాల్గొన్నారు.
